Tue, 17 Sep 2019

Cebuano News: 5,161 ka pamilya sa Bohol, gitabangan sa DSWD-7

Philippine Information Agency
16 Aug 2019, 16:38 GMT+10

TAGBILARAN CITY, Aug. 9 (PIA)--Nikabat sa 5,161 ka pamilya sa mga lungsod sa Talibon ug Buenavista ning lalawigan sa Bohol ang gihatagan og food packs sa Department of Social Welfare and Development (DSWD)-7, Huwebes, Agosto 8.

Kini agi og tubag sa hangyo sa probinsiyal nga kagamhanan ug mga mayor sa mga nahisgotang mga lungsod nga nangayo sa DSWD assistance alang sa mga pamilya nga naapektohan sa Southwest monsoon o "Habagat" nga gipakusog pa sa bagyong Hanna.

Kadaghanan sa mga natabangan nagpuyo sa mga coastal area nga wala nakapanagat tungod sa kahadlok nga mabutang sa peligro ang kinabuhi sa mga mananagat tungod sa mga dagkung bawod tungod sa weather disturbance.

Ang barangay Nocnocan, Suba, Sag, Busalian, Calituban, Guindacpan, Mahanay ug Cataban sa lungsod sa Talibon ug Western ug Eastern Cabul-an sa lungsod sa Buenavista ang nakadawat sa mga food packs.

Ang habagat o hanging habagat usa ka init nga temperatura sa panahon nga nagdala og mga kusog nga ulan, nga gikan sa habagatan-kasadpan nga parte sa Asya nga naggikan sa mga nasod sa India, Indonesia, Malaysia, Thailand ug Singapore.

Ang habagat moabot sugod sa buwan sa Hunyo hangtod Setyembre o Oktubre.

Ang hanging habagat mokusog kun adunay bagyo sa kadagatang parte sa pasipiko sa kadagatan sa Pilipinas. (ecb/PIA7-Bohol)

Sign up for Thailand News

a daily newsletter full of things to discuss over drinks.and the great thing is that it's on the house!